Ku donashon di nir na bida un donor bibu ta duna un nir na un nefrítiko. Sigur ta posibel pa biba ku un nir so. Tantu famianan komo konosínan por duna nan nir na un ser kerí. Hasta ta posibel pa duna un nir anónimamente na un deskonosí.
Pakiko donashon di nir na bida ta importante?
- E lista di espera pa un nir di un donor morto ta largu: 2.5 – 5 aña. Ku donashon di nir na bida nefrítikonan por wòrdu yudá mas lihé.
- Ku donashon di nir un nefrítiko no tin nodi di dialisá (mas). Diálisis ta nifiká ku e sanger di un nefrítiko ta wòrdu purifiká. Ta nesesario dialisá un nefrítiko p’e keda na bida, pero esei ta enserá tambe hopi desbentaha. Ora un donor bibu ta disponibel na tempu, diálisis no ta nesesario mes di ningun manera. E donor mester ta disponibel kaba, promé ku diálisis ta nesesario. Ku un nir nobo e kalidat di bida di un nefrítiko ta wòrdu mehorá hopi.
- Un nir donante di un donor bibu i salú ta di bon kalidat. Un nir donante di un donor bibu ta funshoná mas o ménos 20 aña. Un nir donante di un donor morto hopi biá solamente 10 aña.
- E kalidat di e nir ta keda konservá mihó ku un donashon di nir bibu. Esei ta pasombra e operashonnan di e donor i risibidó por wòrdu planeá.
Mas informashon
Pa mas informashon tokante donashon di nir na bida por mira aki pelíkulanan di Erasmus MC.
